Fréttir

Í vetur hafa fulltrúar heilsugæslustöðvarinnar átt í óformlegum viðræðum við Seltjarnarnesbæ um mögulega stækkun á húsnæði stöðvarinnar og breytingu á eignarhaldi núverandi húsnæðis. Með flutningi bókasafnsins á Eiðistorg skapaðist svigrúm fyrir heilsugæsluna til að mæta þörf fyrir aukið húsrými og þar með eflingu þjónustu í vesturbæ og á Seltjarnarnesi.

Á vef FMR má sjá að á tímabilinu 1994 til 2003 hefur meðalfermetraverð fasteigna á Seltjarnarnesi tvöfaldast og er hið hæsta á landinu. Fyrir áratug var dýrast að fjárfesta í einbýli í Mosfellsbæ en nú trónir Seltjarnarnes á toppnum. Ljóst er að um gríðarlega hagsmuni er að ræða fyrir fasteignaeigendur á Seltjarnarnesi enda er húsnæði yfirleitt stærsta fjárfesting hverrar fjölskyldu. Helsta skýringin mun vera mikil og vaxandi eftirspurn eftir húsnæði á Seltjarnarnesi en staðsetningin ásamt einstakri náttúru, traustri fjárhagsstöðu bæjarfélagsins og góðri þjónustu gerir Seltjarnarnes að einu af eftirsóttustu bæjarfélögum landsins.

Þessa dagana er félagsstarf aldraðra að hefjast eftir jólaleyfi. Að venju er dagskráin fjölbreytt og margt spennandi í boði. Auk handavinnu er boðið upp á keramik og postulínsstimplun, tréskurð, bókband og glerskurðarnámskeið. Leikfimi verður stunduð tvisvar í viku og boccia einu sinni í viku. Auk þess eru spilakvöld annan hvern þriðjudag til vors og einu sinni í mánuði er farið í óvissuferð.

Um 770 grunnskólanemendur á Seltjarnarnesi fengu heimsókn s.l. miðvikudag frá Slysavarnardeild kvenna á Seltjarnarnesi sem færði hverjum nemanda endurskinsmerki. Með þeim í för voru félagarar úr björgunarsveitinni Ársæli. Rætt var við nemendur um notkun hjálma á skautum, skíðum, hjólum og brettum. Einnig var starf unglingadeildar björgunarsveitarinnar kynnt en nemendur í 9 bekk grunnskóla geta gengið í unglingadeildina.

Nýlega staðfesti bæjarstjórn tillögu skólanefndar nýja gjaldskrá fyrir leikskóla Seltjarnarness en fyrri gjaldskrá var frá júní 2001. Með hinni nýju gjaldskrá bætast m.a. við nýir afsláttarflokkar. Nýtt 25% aflsáttargjald er t.d. komið inn fyrir foreldra sem gildir þar sem annað foreldrið er í fullu námi og er Seltjarnarnesbær þriðja bæjarfélagið á landinu sem veitir slíkan afslátt. Séu báðir foreldrar í námi nemur afslátturinn 40%.

Nýr bæjarlistamaður Seltjarnarness var útnefndur þann 10. janúar s.l. í hófi sem haldið var í nýju og glæsilegu húsnæði Bókasafns Seltjarnarness. Fyrir valinu varð Margrét Helga Jóhannsdóttir leikkona sem tekur við nafnbótinni af tónlistarmanninum Bubba Morthens. Margrét Helga sagði m.a. í þakkarræðu sinni að hún liti svo á að ekki væri aðeins verið að heiðra hana heldur einnig þá listgrein sem hún stendur fyrir. Leiklistin hefði á stundum verið hálfgerð hornreka þegar kæmi að viðurkenningum á borð við þessa enda list augnbliksins. Hún þakkaði síðan enn frekar fyrir sig með því að syngja ásamt Jóhönnu Vigdísi Arnardóttur dúett úr söngleiknum Chicago sem frumsýndur verður innan skamms í Borgarleikhúsinu.

Þann 1. desember sl. voru 125 ár liðin frá því að fyrst var tendrað vitaljós við Íslandsstrendur þegar kveikt var á olíulampa Reykjanessvitans gamla sem löngu er horfinn af sjónarsviðinu. Af því tilefni gekkst Íslenska vitafélagið í samstarfi við Siglingastofnun, Seltjarnarnesbæ og fleiri aðila fyrir flóðlýsingu Gróttuvita. Vitinn þótti henta vel til þessa þar sem um fagra byggingu er að ræða sem stendur í námunda við fjölmenna byggð.

Leikskólinn Mánabrekka hefur náð þeim merka áfanga að vera tekinn inn í Grænfánann, en það er umhverfismerki sem nýtur virðingar víða um Evrópu sem tákn um góða fræðslu og umhverfisstefnu í skólum. Mánabrekka er einn örfárra leikskóla í landinu sem hefur náð þessum árangri. Strax í upphafi leikskólans var mörkuð ákveðin umhverfisstefna og markvisst hefur verið unnið að umhverfisfræðslu og umhverfisvernd með börnum og starfsfólki skólans. Skólar sem öðlast rétt til þátttöku í Grænfánaverkefninu þurfa að uppfylla a.m.k. sjö skref til að fá að flagga Grænfánanum.

Aðalskrifstofa UNESCO hefur samþykkt að veita Mýrarhúsaskóla aðild að alþjóðlegu samstarfi ASP-skólanna. Þetta gerir skólanum kleift að taka þátt í alþjóðlegu nýbreytnistarfi á sviði menntunar í anda þeirra gilda sem UNESCO stendur fyrir. Jafnframt er gert ráð fyrir að skólinn verði leiðandi fyrir aðra íslenska skóla sem vilja taka upp starf í þessum anda.

Ragna Ingimundardóttir leirlistakona kom færandi hendi á Bókasafn Seltjarnarness skömmu fyrir jól og gaf safninu tvo veglega leirvasa. Þær Pálína Magnúsdóttir bæjarbókavörður og Sólveig Pálsdóttir formaður menningarnefndar voru að vonum ánægðar með gjöfina og kunna Rögnu, sem var bæjarlistamaður Seltjarnarness árið 1998, bestu þakkir fyrir höfðinglega gjöf sem sómir sér afar vel í hinu nýja og glæsilega húsnæði safnsins á Eiðistorgi.

Seltjarnarnesbær er óðum að taka á sig jólalegan blæ enda skammt að bíða þess að hátíðin gangi í garð. Í lok nóvember voru skreytingar settar á ljósastaura og gatnamót Suðurstrandar og Nesvegs. Að þessu sinni var aukið við skreytingarnar þannig að nú er Nesvegur skreyttur frá bæjarmörkunum að gatnamótunum. Þaðan taka við skreytingar meðfram Suðurströnd allt að Bakkavör.

Í fjárhagsáætlun næsta árs er gert ráð fyrir að í kringum 65 milljónum verði varið til nýfjárfestinga og viðhalds á skólamannvirkjum Seltjarnarnesbæjar. Í áætluninni kemur fram að um 9 milljónum verði varið til viðhalds og framkvæmda við Valhúsaskóla. Meðal annars á að ljúka við anddyri skólans sem reist var í sumar. Einnig á að ljúka við endurnýjun eldri stofa skólans ásamt fleiru. Að loknum þessum framkvæmdum má segja að búið sé að endurnýja allan Valhúsaskóla.