Fréttir

Í samræmi við skipulags- og byggingarlög nr. 73/1997 með síðari breytingum hefur bæjarstjórn Seltjarnarness samþykkt deiliskipulag á Suðurströnd, skóla- og íþróttasvæði.

Í kjölfar samþykktar nýs deiliskipulags skóla- og íþróttasvæðis er bygging nýrrar og glæsilegrar heilsuræktar World Class fyrir Seltirninga á beinu brautinni á grundvelli viljayfirlýsingar bæjarstjórnar Seltjarnarness og Þreks hf. Hönnun hefur staðið yfir frá því í vor og hefjast framkvæmdir núna í janúar.

Nú í byrjun janúar var gengið frá hitalögninni undir gervigrasvellinum og hita hleypt á kerfið. Sérpantaðir forhitarar sem beðið var eftir komu upp úr miðjum desember og var þá hægt að ljúka verkinu. Gervigrasvöllurinn er því orðinn upphitaður sem tryggir að hægt er að spila á honum í nánast hvaða veðri sem er en þess utan er upphitun nauðsynleg til að verja hann skemmdum.

Sérstakur starfshópur skipaður af heilbrigðisráðherra um byggingu hjúkrunarheimilis á Lýsislóð kom saman til fyrsta fundar í upphafi árs. Hópnum er ætlað að vinna að frumáætlun sem lögð verður fyrir fjármálaráðuneytið auk þess að taka ákvarðanir um gerð og framgang húsnæðisins á hönnunartíma.

Börnum á Seltjarnarnesi fjölgaði umtalsvert eða um 10% á síðasta ári. Þannig fluttu mun fleiri fjölskyldur með ung börn til Seltjarnarness á árinu en frá bæjarfélaginu. Þetta er ánægjuleg þróun sem kemur í kjölfar nokkurra ára samfelldrar fækkunar nemenda í skólum á Seltjarnarnesi.

Haustið 2006 hófu fimm starfsmenn í leikskólum Seltjarnarness nám í Leikskólabrú við Fjölbrautarskólanum í Garðabæ. Skólaskrifstofur fimm sveitarfélaga á höfuðborgarsvæðinu, Garðabæjar, Hafnarfjarðar, Kópavogs, Mosfellsbæjar og Seltjarnarnes, gerðu samning við Fjölbrautarskólann í Garðabæ um nám til handa reyndum starfsmönnum leikskólanna.

Stuttu fyrir jól lauk jarðvinnu í tengslum við lagningu ljósleiðarans. Heimlögn er því komin að nánast öllum byggingum á Seltjarnarnesi og er nokkuð síðan tenging lagna innan húss komst á fullt skrið. Ýmsir þættir verksins eru nokkuð á eftir áætlun en í heild miðar vel.

Íslenskir aðalverktakar hf.hafa gengið frá kaupum á byggingarréttinum á Hrólfsskálamel af Seltjarnarnesbæ. Greiðslan sem byggir á samningi aðila frá því í apríl síðast liðnum nemur tæpum 1.300 milljónum króna.

Grant Thornton endurskoðun ehf hefur skilað af sér greinargerð um fjárhagsstöðu Seltjarnarnesbæjar fyrir árið 2005. Sem fyrr þykir fjármálastjórn og fjárhagsstaða bæjarins með því besta sem gerist meðal sveitarfélaga á landinu. Peningaleg staða er sterk og með því besta sem gerist á meðal sveitarfélaga.

Seltjarnarnesbær er óðum að taka á sig jólalegan blæ enda styttist ört í jólin. Skreytingum á vegum bæjarfélagsins var að venju komið upp í endaðan nóvember og var að þessu sinni enn aukið við skreytingarnar.

Leikskólinn Mánabrekka á Seltjarnarnesi fékk þann 1. desember afhentan Grænfánann í annað sinn vegna öflugs starfs í þágu umhverfisverndar og umhverfismenntar. Grænfáninn er afhentur til tveggja ára í senn en hann er umhverfismerki sem nýtur virðingar víða í Evrópu sem tákn um árangursríka fræðslu og umhverfisstefnu í skólum.

Selkórinn dvaldi í Austurríki fimmtudaginn 30. nóvember til 4. desember og hélt tvenna tónleika í Vín. Föstudaginn 1. desember tók kórinn þátt í aðventuhátíð í Ráðhúsi Vínarborgar og sunnudaginn 3. desember hélt kórinn tónleika í Péturskirkjunni sem er í hjarta borgarinnar.