Grant Thornton endurskoðun ehf hefur skilað af sér greinargerð um fjárhagsstöðu Seltjarnarnesbæjar fyrir árið 2005. Sem fyrr þykir fjármálastjórn og fjárhagsstaða bæjarins með því besta sem gerist meðal sveitarfélaga á landinu. Peningaleg staða er sterk og með því besta sem gerist á meðal sveitarfélaga.
Í árslok 2005 var staða A-hluta bæjarsjóðs jákvæð upp á 122 þúsund krónur á íbúa og styrkist um tæp 40% á milli ára. Skuldastaða bæjarins er einnig lægri en þekkist meðal sambærilegra sveitarfélaga en nettóskuld samstæðureiknings á íbúa lækkar enn.
Seltjarnarnes gæti þannig greitt upp nettóskuld sína á fjórum mánuðum á meðan samanburðarsveitarfélög væru á bilinu 3 til 10 ár að greiða sínar nettóskuldir. Veltufjárhlutfall bæjarins styrkist enn á milli ára og hækkar úr 1,45 í árslok 2004 í 2,1 í árslok 2005. Hlutfallið er því vel yfir æskilegu lágmarki sem almennt er álitið um 1,0.