Íþrótta- og tómstundanefnd

292. (31) fundur æskulýðs- og íþróttaráðs Seltjarnarness, haldinn 10. mars, 2005 kl. 17:30 í Íþróttamiðstöð Seltjarnarness.

Mætt voru: Ásgerður Halldórsdóttir, Árni Einarsson, Sigrún Edda Jónsdóttir, Sjöfn Þórðardóttir, Nökkvi Gunnarsson og Haukur Geirmundsson.

Gestir: Anna K. Hjartardóttir og Margrét Leifsdóttir.

Ritari fundar Árni Einarsson.

Dagskrá:

1. Sundlaugarbreytingar

 Anna K. Hjartardóttir og Margrét Leifsdóttir arkitektar kynna nýjar teikningar.

2. Önnur mál.
a. Styrkbeiðni frá fimleikadeild Gróttu.
b. Styrkbeiðni frá Ballettskóla Guðbjargar.
 

1. Anna og Margrét kynntu nýjustu drög að teikningum vegna breytinga á sundlaug og íþróttahúsi. Gert er ráð fyrir að framkvæmdum verði skipti í tvo áfanga. Fyrri áfanginn felur í sér framkvæmdir við sundlaug, böð á 1. hæð í tengslum við sundlaug, inngang og andyri og baðaðstöðu í tengslum við nýjasta hluta íþróttamiðstöðvarinnar auk aðstöðu fyrir starfsfólk og gesti á 1. hæð. Teikningarnar falla vel að hugmyndum ÆSÍS, en ráðið var sammála um að ljúka þyrfti byggingu allra búningsklefa við nýja íþróttahús í einum áfanga, enda fyrirliggjandi brýn þörf. Einnig var talið nauðsynlegt vegna slysahættu að leggja hitalögn/snjóbræðslu umhverfis alla sundlaugina, svo og í tröppur við inngang rennibrautar fyrir börn. Leiktæki í busllaug barna þurfa að koma strax og laugin verður tekin í gagnið.
Rætt var um fyrirkomulag sólbaðsaðstöðu, heitra potta og útibaða með tilliti til skuggamyndunar og umferðar. Óhjákvæmilegt er að gera ráð fyrir að innangengt sé á milli sundlaugarbyggingar og íþróttahúss.
Anna og Margrét munu vinna úr þeim hugmyndum og athugasemdum sem fram komu á fundinum. Þar sem aðeins er u.þ.b. mánuður þar til framkvæmdir eiga að fara í útboð þarf að taka sem allra fyrst ákvarðanir um þá þætti sem enn eru óljósir svo hægt sé að ljúka nauðsynlegri arkitektavinnu.
Anna og Margrét viku af fundi kl. 19.oo.

2. a. Óskað eftir styrk vegna þátttöku í bikarmóti Fimleikasambands Íslands. Samþykkt að veita deildinni styrk að upphæð 200 þúsund krónur.
b. Samþykkt að veita skólanum styrk að upphæð 100 þúsund krónur vegna uppfærslu á Svanavatninu.

Fundi slitið kl. 19.10.