Fara í efni

Bæjarstjórn

1004. fundur 09. apríl 2025 kl. 17:00 - 18:04 fundarsal bæjarstjórnar að Austurströnd 2, Seltjarnarnesi

1004. Bæjarstjórnarfundur var haldinn fimmtudaginn 9. apríl 2025, kl. 17:00 þegar að bæjarstjórn Seltjarnarness kom saman til fundar í fundarsal sínum að Austurströnd 2.

Fundinn sátu: Ragnhildur Jónsdóttir (RJ), Þór Sigurgeirsson (ÞS), Svana Helen Björnsdóttir (SHB), Dagbjört Snjólaug Oddsdóttir (DSO), Sigurþóra Bergsdóttir (SB), Karen María Jónsdóttir (KMJ) og Bjarni Torfi Álfþórsson (BTÁ).

Fundargerð ritaði: Svava G. Sverrisdóttir.

Fundurinn er sendur út samtímis á netinu og vistaður á heimasíðu bæjarins.

Ragnhildur Jónsdóttir forseti bæjarstjórnar setti fund og stjórnaði.

Gengið var til dagskrár og fyrir tekið:

1. Ársreikningur Seltjarnarnesbæjar og stofnana árið 2024 – seinni umræða

Á fundinn undir þessum dagskrárlið er mættur Sturla Jónsson, endurskoðandi frá Grant Thornton. Hann kynnti ársreikning bæjarins og stofnana hans fyrir árið 2024 og endurskoðunarskýrslu 2024.

Forseti gaf orðið laust og fór fram umræða um ársreikninginn eins og hann liggur fyrir eftir fyrri umræðu.

Bæjarstjóri lagði til við bæjarstjórn að samþykkja ársreikninginn fyrir árið 2024.

Bæjarstjórn skilar þökkum til starfsfólks bæjarins, fyrir góða vinnu og þeirra þátt í umbótum sem hafa orðið á rekstri bæjarins á árinu 2024.

Forseti bar upp ársreikning bæjarins og stofnana hans í einu lagi til samþykktar. Ársreikningur Seltjarnarnesbæjar og stofnana fyrir árið 2023 er samþykktur samhljóða og afgreiddur skv. 61. gr. sveitarstjórnarlaga nr. 138/2011, sbr. 2. tl. 1. mgr. 18.gr. laganna.

Samþykktinni til staðfestingar er ársreikningurinn undirritaður af viðstöddum bæjarfulltrúum.

Bókun meirihluta:

Ársreikningur Seltjarnarnesbæjar fyrir árið 2024 sýnir jákvæðan viðsnúning í rekstri bæjarins. Skýrist sá viðsnúningur af auknu aðhaldi í rekstrinum eftir þungt rekstrarár árið 2023. Enn fremur höfðu mótvægisaðgerðir sem gripið var til, m.a. sala á húsnæði hjúkrunarheimilisins, góð áhrif á sjóðsstöðu bæjarins. Með því var unnt að greiða upp skammtímaskuldir þannig að það létti verulega á fjármagnskostnaði.

Halli á samstæðu nemur 107 m.kr. á árinu 2024, samanborið við 798 m.kr. árið áður, sem er viðsnúningur upp á 691 m.kr. Gjaldfærsla lífeyrisskuldbindinga nemur 227 m.kr. á árinu, sem er töluverð lækkun milli ára. Viðsnúningurinn er þó verulegur að teknu tilliti til þessarar lækkunar, ekki síst þar sem enn er að skapast kostnaður vegna framkvæmda í grunnskólahúsnæði bæjarins, þótt þær framkvæmdir hafi að miklu leyti einkennst af uppbyggingu. Fjármagnskostnaður á árinu nam 277 m.kr., en vextir og verðbólga eru nú á niðurleið sem er jákvæð þróun. Halli á A-hluta nemur tæpum 464 m.kr. á árinu 2024 samanborið við 867 m.kr. halla árið 2023. Er það viðsnúningur upp á nær 404 m.kr., sem má teljast gott.

Skatttekjur bæjarfélagsins aukast um 8,5% milli ára og framlög Jöfnunarsjóðs sveitarfélaga aukast um 28,1%. Útlit er fyrir að tekjustofn bæjarins muni styrkjast enn frekar með fjölgun íbúa þegar fólk flyst í Gróttubyggð. Það mun renna enn styrkari stoðum undir grunnrekstur bæjarins. Áfram verður lögð áhersla á aðhald og ábyrgð í rekstri. Það er forsenda þess að áfram sé hægt að halda úti framúrskarandi grunnskólum og leikskólum, auk þess að veita bæjarbúum aðra þjónustu á sem bestan hátt.

Kennitölur 2024: A hluti 2024: A & B hluti 2023: A hluti 2023: A & B hluti
Skuldaviðmið 90% 81% 92% 93%
Skuldahlutfall A hluta 122% 107% 142% 138%
Rekstrarniðurstaða -463.600.586 kr. -107.262.592 kr. -867.051.131 kr. -797.622.329 kr.
Fjárfesting í varanlegum rekstrarfjármunum 16% 15% 8% 10%
Veltufé frá rekstri 3% 6% 0% 3%

Kennitölur endurspegla styrkari rekstur bæjarins:

Uppskipting Grunnskóla Seltjarnarness í tvær sjálfstæðar einingar, Mýrarhúsaskóla og Valhúsaskóla, að undangenginni fýsileikakönnun, gekk í gegn fyrir yfirstandandi skólaár og var skiptingin byggð á faglegum sem og á fjárhagslegum grunni.

Málaflokkur fatlaðs fólks hefur verið bænum fjárhagslega þungur, en þjónustuþörf hefur vaxið töluvert undanfarið ár og hefur Seltjarnarnesbær reynt að mæta þeirri aukningu eins vel og kostur er. Samlegðaráhrif vegna breytinga á rekstri í þessum málaflokki, svo sem með tilkomu búsetukjarna fyrir fatlað fólk, koma til með að skila sér til baka á komandi misserum. Síðan málaflokkurinn var færður yfir til bæjarfélagsins hefur kostnaður vaxið mun hraðar en tekjurnar, enda var kostnaður verulega vanáætlaður við tilfærsluna, auk þess sem kröfur um þjónustu hafa aukist síðustu ár.

Mesti þungi framkvæmda ársins 2024 var við kostnaðarsama endurbyggingu Mýrarhúsa- og Valhúsaskóla, en báðar byggingar hafa verið endurnýjaðar að miklu leyti. Þær endurbætur hafa gengið vonum framar og er almenn ánægja með afraksturinn og óhætt er að segja að við búum að því að eiga gott skólahúsnæði eftir þessar breytingar.

Við höldum áfram hagræðingaraðgerðum sem eru þegar komnar til framkvæmda. Engin lán voru tekin á árinu 2024. Skammtímaskuldir hafa verið greiddar upp sem lækkar vaxtabyrði bæjarins um liðlega 100 m.kr. á ársgrundvelli. Miklar fjárfestingar í skólahúsnæði bæjarins hafa hins vegar gengið verulega á sjóði bæjarins en ekki er stefnt að frekari lántökum fyrst um sinn. Eins og alltaf eru til skoðunar leiðir til lækkunar kostnaðar við þjónustu og vörukaup. Unnið er markvisst að því að styrkja afkomu samstæðu og þá sérstaklega A-hluta bæjarsjóðs sem mun leiða til þess að bæjarsjóður uppfylli jafnvægisreglu Eftirlitsnefndar með fjármálum sveitarfélaga.

Við erum sannarlega á réttri leið eins og niðurstaða ársreikningsins sýnir glöggt.

Við bæjarfulltrúar meirihlutans horfum sannarlega björtum augum til líðandi árs með augun á því sem öllu skiptir, sem er velferð og ánægja íbúa Seltjarnarnesbæjar.

Bæjarfulltrúar meirihluta:

Ragnhildur Jónsdóttir, forseti bæjarstjórnar

Þór Sigurgeirsson, bæjarstjóri

Svana Helen Björnsdóttir

Dagbjört Snjólaug Oddsdóttir

 

Bókun Samfylkingar og óháðra við ársreikning sveitarfélagsins fyrir árið 2024

Samfylkingin og óháðir lýsa miklum vonbrigðum með enn eitt tapárið í rekstri A-hluta sveitarfélagsins. Hefur nú verið rekinn samfelldur hallarekstur á A-hluta í átta ár og lítið sem bendir til þess að það breytist á næstunni. Upp¬safnaður halli á A-hluta yfir tímabilið 2017–2024 nemur nú rúmlega 3 milljörðum króna, en þessi þróun undirstrikar að halli í rekstri bæjarfélagsins er orðin regla, fremur en undantekning.

Til að uppfylla fjárhagsleg markmið sem sett eru fram í jafnvægisreglu eftirlitsnefndar sveitafélaga þyrfti rekstrarniðurstaða fyrir afskriftir A-hluta fyrir árið 2025 að nema um 740 milljónum. Fjárhagsáætlun ársins gerir þó aðeins ráð fyrir 420 milljóna afgangi sem nægir ekki til að loka þessu gati. Að auki verður að teljast ólíklegt að fjárhagsáætlun 2025 haldi, sérstaklega í ljósi nýlegra samninga við kennara, breytinga á úthlutun jöfnunarsjóðs og annarra ófyrirséðra kostnaðarliða, sem hafa orðið að reglu undanfarin ár.

Samanlagður halli A-hluta árin 2022–2024 er um 1.400 milljónir króna. Á sama tíma hefur sveitarfélagið ítrekað ekki uppfyllt jafnvægisregluna, sem hefur nú kallað á viðvörun frá eftirlitsaðilum. Sú viðvörun þarf að vera tekin alvarlega. Enn eitt árið kemur fram ábending í endurskoðunarskýrslu sem, með leyfi forseta, hljómar svona;

“Er því ítrekuð ábending okkar frá síðasta ári að sveitarfélagið setji fram markvissa áætlun um við snúning í ´rekstri, ss. Í formi aukinna tekna, eða aðhaldsaðgerða í þeim tilgangi að draga úr rekstrarhalla”.

Þessi ábending hefur verið endurtekin ár eftir ár án þess að viðeigandi viðbrögð hafi komið frá meirihlutanum.

Samfylkingin og óháðir hafa ítrekað bent á að ef sveitarfélagið hefði verið með fullt útsvar undanfarin ár væri uppsafnaður halli er á rekstri A-sjóðs verulega mikið minni. Gróf áætlun sýnir að hægt hefði verið að auka tekjur síðustu 6 - 8 ára um að minnsta kosti einn milljarð króna með því einu að nýta útsvarstekjur til fulls. Því er dapurlegt að sjá áherslu á að halda útsvari óbreyttu þegar það bitnar með þessum hætti á fjárhag sveitarfélagsins – skuld sem verður svo látin koma á herðar komandi kynslóða.

Rekstur sveitarfélagsins hefur síðustu ár einkennst af vörnum og viðbrögðum – við höfum verið að moka í skurð sem þrátt fyrir allt aðeins dýpkar. Það er lítið sem bendir til framtíðarsýnar, uppbyggingar eða nýsköpunar í rekstri sveitarfélagsins. Á meðan heldur hallarekstur áfram og nauðsynlegar kerfisbreytingar og stefnumótun eru látin sitja á hakanum.

Minnihlutinn skorar á meirihlutann að axla ábyrgð og hefja strax vinnu við raunhæfa og markvissa áætlun um viðsnúning í rekstri bæjarins – áður en staðan verður enn alvarlegri.

Bæjarfulltrúar Samfylkingar og óháðra:

Sigurþóra Bergsdóttir

Karen María Jónsdóttir

Bjarni Torfi Álfþórsson

Til máls tóku: ÞS, BTÁ, SB, SHB og RJ

2. Fundargerð 339. fundar skólanefndar

Fundargerðin lögð fram til samþykktar.

Bæjarstjórn samþykkir fundargerðina, sem er í 7 töluliðum, samhljóða.

Til máls tók: RJ, BTÁ, DSO, SB og ÞS

3. Fundargerð 27. fundar Öldungaráðs

Fundargerðin lögð fram.

4. Fundargerð 136. fundar svæðisskipulagsnefndar

Fundargerðin lögð fram.

Til máls tóku: SHB og KMJ

5. Fundargerð 602. fundar stjórnar SSH

Fundargerðin lögð fram.

Undir fyrsta dagskrárlið fundarins voru drög að stofnskjölum nýs félags um rekstur almenningssamgangna á höfuðborgarsvæðinu lögð fram ásamt minnisblaði og þeim vísað til afgreiðslu á vettvangi sveitarfélaganna. Erindið var kynnt og samþykkt af bæjarráði 1. apríl sl. í þeirri fundargerð sem fór fyrir síðasta bæjarstjórnarfund 2. apríl.

Bæjarstjórn Seltjarnarness veitir bæjarstjóra umboð fyrir hönd bæjarins að undirrita og samþykkja stofnsamning, samþykktir og hluthafasamkomulag Almenningssamgangna ohf., félags um rekstur almenningssamgangna.

6. Fundargerð 32. fundar Heilbrigðisnefndar Garðabæjar, Hafnarfjarðar, Kópavogs, Mosfellsbæjar og Seltjarnarness

Fundargerðin lögð fram.

 

Fundi slitið kl. 18:04

Loka
Var efnið á síðunni hjálplegt?