Síðastliðinn föstudag hlaut Ungmennaráð Seltjarnarness nýsköpunarviðurkenningu í opinberri þjónustu og stjórnsýslu, en afhending viðurkenningarinnar fór fram á ráðstefnu á Grand hótel.
Síðastliðinn föstudag hlaut Ungmennaráð Seltjarnarness nýsköpunarviðurkenningu í opinberri þjónustu og stjórnsýslu, en afhending viðurkenningarinnar fór fram á ráðstefnu á Grand hótel.
Þetta er í fjórða sinn sem nýsköpunarverkefni í opinberri stjórnsýslu hljóta viðurkenningu og verðlaun, en önnur tvö verkefni á vegum Seltjarnarnesbæjar voru einnig tilnefnd.
Að viðurkenningum og verðlaunum standa Rannís, Samband íslenskra sveitarfélaga, Félag forstöðumanna ríkisstofnana, Fjármála- og efnahagsráðuneytið, Háskóli Íslands og Nýsköpunarmiðstöð Íslands. Í rökstuðningi dómnefndar segir um valið á Ungmennaráðinu:
„Að mati valnefndar er þarna um að ræða lausnarmiðað verkefni sem fólst í því að breyta fyrirkomulagi þess til að virkja fleiri ungmenni til þátttöku í sveitarfélaginu. Verkefnið snýst um að taka ungmennaráðið úr hefðbundnu nefndarfyrirkomulagi með lokuðu ráði og opna fyrir frekari þátttöku allra þeirra sem vilja taka þátt. Um er að ræða verkefni sem grundvallast á hugmyndum um beinna lýðræði og samvinnu sem hefur virkjað mun fleiri til þátttöku í verkefnum Ungmennaráðsins en ella hefði orðið. Jafnframt styrkir það innbyrðis tengsl ungmenna annars vegar og tengsl þeirra við ýmsar stofnanir og félagasamtök í bænum hins vegar."