Dagur tónlistarskólanna var haldinn hátíðlegur í Tónlistarskóla Seltjarnarness laugardaginn 18. febrúar. Fjöldi manns sótti opið hús, þar sem nemendur og kennarar buðu upp á sýnishorn af öllum stílbrigðum tónlistar sem kennd er við skólann. Í kennslustofum voru hljóðfærakynningar, þar sem kennarar kynntu sín hljóðfæri og var gestum boðið að prófa hljóðfærin undir leiðsögn.
Dagur tónlistarskólanna er haldinn síðasta laugardag í febrúarmánuði ár hvert, en var að þessu sinni viku fyrr á ferðinni á Seltjarnarnesi vegna vetrarleyfa skólanna. Við þetta tækifæri efna tónlistarskólarnir til hátíðar hver á sínum stað, sem er ávallt skemmtilegt innlegg í menningarlíf hvers byggðarlags. Í Tónlistarskóla Seltjarnrness eru nú um 220 nemendur og þar starfa rúmlega 20 kennarar. Auk þess eru starfandi tvær lúðrasveitir við skólann, fjöldi samspilshópa og hljómsveita.
