Fjölmenni var á íþrótta- og tómstundaþingi sem fram fór í Valhúsaskóla á Seltjarnarnesi laugardaginn 1. mars og var gerður góður rómur að framtaki ÍTS um að standa að slíku samráði við bæjarbúa
Fjölmenni var á íþrótta- og tómstundaþingi sem fram fór í Valhúsaskóla á Seltjarnarnesi laugardaginn 1. mars og var gerður góður rómur að framtaki ÍTS um að standa að slíku samráði við bæjarbúa.
Markmiðið með þinginu var að stíga fyrstu skrefin í mótun framtíðarstefnu í íþrótta- og tómstundamálum á Seltjarnarnesi. Tilgangurinn með þinginu var að efna til opinnar samræðu íbúa og kalla eftir hugmyndum, skoðunum og væntingum bæjarbúa og allra aðildarfélaga til málefnisins. Undir skilgreininguna fellur öll tómstundaiðkun sem og félags- og æskulýðsstarf fólks á öllum aldri, en á þinginu var einnig mikið rætt um útivist, forvarnir og lýðheilsu.
Framtíðarstefna íþrótta- og tómstundamála Seltjarnarness verður meðal annars byggð á þeim gögnum og niðurstöðum sem fengust á þinginu í því skyni að efla og virkja skoðanir og hugmyndir íbúanna sjálfra.
