Framkvæmdir við sparkvöll með gervigrasi sem rísa mun á horni Lindarbrautar og Hofgarða á Seltjarnarnesi eru á fullum skriði.
Lóðin sem völlurinn rís á er nefnd Snægerði og er í vesturhverfi Seltjarnarness.
Sparkvöllurinn sem þar rís er samstarfsverkefni KSÍ og Seltjarnarnes-bæjar og hluti af átaki í gerð slíkra valla víða um land í samstarfi sveitarfélaga og KSÍ.
Völlurinn er sambærilegur að gerð og annar sparkvöllur sem reistur var við Valhúsaskóla fyrir nokkrum árum og hefur notið mikilla vinsælda. Stærð vallarins er 18 x 33 metrar og ætlaður fyrir börn og unglinga. Hann verður girtur af með viðargirðingu og falla mörkin inn í girðinguna.
Nýi völlurinn verður án efa kærkomin viðbót fyrir hina fjölmörgu áhugamenn um knattspyrnu á Seltjarnarnesi.