Skóla- og frístundastarf - viðmið er snúa að tilslökunum frá samkomubanni og sóttvarnaráðstöfunum vegna Covid-19 frá 4. maí.

Í auglýsingu stjórnvalda um takmörkun á samkomum vegna farsóttar, dagsett 21. apríl 2020 segir í 8. grein um takmörkun gildissviðs:

Ákvæði 3., 4. og 5. gr. auglýsingar þessarar taka ekki til nemenda í starfsemi leik- og grunn­skóla þannig að þar sé hægt að halda óskertri vistun og kennslu. Sama á við um starfsemi dag­foreldra, frístundaheimila, félagsmiðstöðva og aðra lögbundna þjónustu á leik- og grunnskólastigi. Í því felst að ekki eru takmarkanir á því hversu margir nemendur geti verið saman komnir eða nálægð þeirra í framang­reindri starfsemi, þ.m.t. í frímínútum og mötuneyti. Öðrum en nemendum ber í framan­greindri starfsemi að fara eftir ákvæðum auglýsingarinnar eins og unnt er.

Viðkvæmir hópar

• Starfsmenn og nemendur sem eru í skilgreindum áhættuhópum vegna Covid-19 haldi sig heima þar til leiðbeiningar um annað koma frá stjórnvöldum. Nauðsynlegt er að starfsfólk skili inn læknisvottorði þar um.
• Starfsfólk og börn með kvef- eða flensueinkenni komi ekki í skóla- eða frístundastarf.
• Ef foreldrar eða aðrir heimilismeðlimir ungra barna sem ekki geta virt eða skilið fjarlægðarmörk, sitja fyrirskipaða sóttkví.  Gildir áfram að börnin taki ekki þátt í skóla- og frístundastarfi. 
• Ef brýnar ástæður eru til geta foreldrar sótt um leyfi fyrir börn sín frá skólasókn.  Slíkar beiðnir skulu vera skriflegar og þar staðfesta foreldrar að þeir beri fulla ábyrgð á námi nemenda á meðan leyfi varir.  Leyfisbeiðnir eru lagðar fram í nemendaverndarráði áður en að skólastjóri tekur ákvörðun um samþykki eða synjun.
• Ef leyfi er samþykkt hefur umsjónarkennari samband við nemanda og foreldra 2-3 sinnum í viku til að fylgjast með líðan og framgangi náms.

• Áfram skal gera ráð fyrir viðbótarþrifum og sprittun í skóla- og frístundastarfi.
• Áfram skal gætt sóttgátar í allri umgengni um húsnæði og í samskiptum.
• Fullorðnir skulu halda 2 metra fjarlægð sín á milli eins og aðstæður leyfa og ekki er heimilt að fleiri en 50 fullorðnir komi saman í sama rými.

Starfsmenn

• Mikilvægt er að allri smitgát sé viðhaldið, sérstaklega í sameiginlegum rýmum sem margir nýta s.s. salerni og kaffistofur. 
• Ekki séu haldir starfsmannafundir nema að hægt sé að viðhafa 2 metra fjarlægðarregluna og þá aldrei með fleiri en 50 manns.
• Undirbúningstímar starfsfólks verði teknir heima ef aðstæður hamla 2 metra reglunni.
• Starfsmenn fjölskyldusviðs sem vinna á fleiri en einni starfsstöð geta aftur hafið venjulega vinnu frá 4. maí. 

Dagforeldrar

• Starfsemi dagforeldra verður með venjubundnum hætti.

Starf í leikskóla

• Opnunartími leikskóla verður 7:45 – 16:30 og í lok dags verði gengið frá og næsti dagur undirbúinn.

Kennsla í grunnskóla

• Almenn kennsla hefst samkvæmt stundaskrá.  Þetta á við um allar list- og verkgreinar, íþróttir og sund og bóklega kennslu.  Hvatt er til þess að íþróttakennsla sé utandyra líkt og tíðkast gjarnan á vordögum. 

Frímínútur og útivera

• Frímínútur og útivera sé með hefðbundnum hætti en hvatt er til þess að skipulagðir séu leikir á skólalóð/útisvæði grunnskóla til að nemendur njóti frímínútna í ríkara mæli.

Mötuneyti

• Matarþjónusta fyrir börn verði með venjubundnum hætti.  
• Í matarþjónustu við starfsfólk skal áfram gæta smitgátar. Forðast skal óvarin matvæli s.s. ávaxtabita úr skál.

Viðburðir, vettvangsferðir og skólaakstur

• Áhersla sé lögð á vettvangsferðir og nýtingu náttúru- og leiksvæða í nágrenni leik-, grunnskóla og frístundaheimila samhliða hefðbundinni útiveru.
• Vettvangsferðir með rútum og strætó eru heimilar.
• Sveitaferðir leikskóla með þátttöku foreldra falli niður eða verði skipulagðar með öðrum hætti.
• Ekki sé farið í gistiferðir s.s. í skólabúðir og útskriftarferðir nema hægt sé að tryggja smitgát á milli fullorðinna einstaklinga (þar með talið 2 metra regluna) og allar sóttvarnir í gistihúsnæði.  
• Ekki verði haldnar vorhátíðir skóla eða aðrir slíkir viðburðir með þátttöku foreldra.
• Útskriftarathafnir þurfa að taka mið af þessum leiðbeiningum, þ.e. séu án aðkomu foreldra, fjöldi starfsmanna í rými sé ekki meiri en 50 og þeir geti haldið 2 metra regluna. Hugað sé að því að nýta „fjarfundatækni“ til að bjóða upp á óbeina þátttöku.

Frístundaheimili

• Starfsemi frístundaheimila verður með venjubundnum hætti. 

Félagsmiðstöðvar

• Starfsemi félagsmiðstöðva verður með venjubundnum hætti.

Samstarf við aðra skóla eða frístundaheimili

• Samstarf milli leikskóla, grunnskóla, tónlistarskóla og frístundaheimila er með venjubundnum hætti en starfsmenn sýni eins og í öðrum aðstæðum smitgát, fjarlægðar- og fjöldatakmörk.

Foreldrar

• Viðburðir í skóla- og frístundastarfi verði án þátttöku foreldra. Hugað sé að því að nýta „fjarfundatækni“ til að bjóða upp á óbeina þátttöku.
• Foreldrar komi ekki inn í grunnskóla og frístundaheimili nema nauðsynlegt sé.
• Foreldrar komi áfram aðeins inn í anddyri eða fataklefa í leikskóla og aðeins einn með hverju barni.
• Fundir skóla með einstaka foreldrum eru heimilir í þar til skilgreindum rýmum ef hægt er að fylgja viðmiðum um smitgát.

Þjónusta við skóla og nemendur

• Þjónusta þjónustumiðstöðvar og fjölskyldusviðs við skóla- og frístundastarf verði með venjubundnum hætti. Æskilegt að hafa fjarfundi þar sem það er kostur en hægt að halda fundi á staðnum ef smitgát er viðhöfð.
• Iðnaðarmenn og birgjar þurfa að sýna ítrustu sóttgátt innan veggja starfsstöðva fjölskldusviðs.
• Forðast skal að gestir og aðrir utanaðkomandi noti vinnuaðstöðu, kaffistofu og salerni starfsmanna viðkomandi skóla.

Tónlistarskóli og lúðrasveitir

• Kennsla verður með venjubundnum hætti. Fjarkennsla getur áfram verið valkostur eftir því sem hentar og við á. Æfingar lúðraveita hefjast að nýju.
• Kennarar geta kennt í fleirum en einum skóla en skulu ekki fara á kaffistofu starfsmanna viðkomandi grunnskóla og skulu gæta ítrustu sóttvarna í allri umgengni.