Áfram miðast fjöldatakmörkun við 100 manns og 2ja metra regluna. Ný auglýsing gildir frá 28. ágúst til 10. september. Sjá nánar: https://www.stjornarradid.is/efst-a-baugi/frettir/stok-frett/2020/08/25/Ny-auglysing-um-takmorkun-a-samkomum-vegna-farsottar/
Ný auglýsing heilbrigðisráðherra um takmarkanir á samkomum vegna farsóttar tekur gildi 28. ágúst næstkomandi og gildir til og með 10. september. Litlar breytingar verða á þeim takmörkunum sem nú gilda og er það í samræmi við tillögur sóttvarnalæknis til heilbrigðisráðherra sem fram koma í meðfylgjandi minnisblaði. Þær breytingar sem þó verða gerðar eru raktar hér að neðan. Efnið var kynnt á fundi ríkisstjórnar í dag.
Auglýsingin tekur ekki til skólastarfs eins og núgildandi auglýsing, heldur er fjallað sérstaklega um takmarkanir á skólahaldi í auglýsingu sem tók gildi 21. ágúst sl. og gildir til 29. september næstkomandi. Sú auglýsing er einnig í samræmi við tillögu sóttvarnalæknis og var unnin í samráði við mennta- og menningarmálaráðuneytið. Markmiðið með þeirri auglýsingu er að raska sem minnst skólastarfi vegna COVID-19 þrátt fyrir að gætt sé að sóttvarnasjónarmiðum.
Helstu breytingar:
- 2 metra reglan: Ákvæði um almenna nálægðartakmörkun er breytt. Þar sem nú er kveðið á um að rekstraraðilar skuli tryggja að hægt sé að tryggja að minnsta kosti 2 metra milli einstaklinga sem ekki deila heimili verður ákvæðið þannig að tryggja beri að hægt sé að tryggja að minnsta kosti 2 metra á milli einstaklinga sem ekki eru í nánum tengslum.
- Íþróttir: Samkvæmt nýju auglýsingunni verða íþróttir almennt leyfðar. Þær íþróttagreinar sem ekki heyra undir ÍSÍ (Íþrótta- og Ólympíusamband Íslands) skulu setja sér leiðbeiningar eða fylgja sömu leiðbeiningum og sambærilegar íþróttagreinar innan ÍSÍ.
- Sviðslistir, tónlist og kvikmyndataka: Snertingar verða heimilar á æfingum í sviðslistum og tónlist á sama hátt og í íþróttum. Sama gildir um kvikmyndatöku.
- Líkamsræktarstöðvar: Takmarkanir vegna sérstakrar smithættu verða þær sömu á líkamsræktarstöðvum og á sund- og baðstöðvum. Gestir mega þar aldrei vera fleiri en nemur helmingi eða minna af leyfilegum hámarksfjölda gesta samkvæmt starfsleyfi.
Eins og áður segir tekur ný auglýsing um takmarkanir á samkomum gildi 28. ágúst og gildir til og með 10. september.