Um 800 manns sóttu Fjölskyldudaginn í Gróttu, sem haldinn var hátíðlegur í 13. sinn, fimmtudaginn 1. maí. Gestir nutu veðurblíðunnar og alls þess besta sem Gróttan og dagskráin höfðu upp á að bjóða.
Börnin sóttu smiðjur í flugdrekagerð og rannsóknum úr sjávarríkinu, harmonikkuleikari lék undir berum himni, börnin léku sér í fjöruborðinu og færri en vildu komust upp í vitann.
Trúbadorinn KK var sérstakur gestur og lék og söng fyrir gesti í Albertsbúð.
Hönnunarsýning Volka, sem hanna húsgögn út frá lögun vita, var í vitavarðarhúsinu og Elsa Nielsen sýndi tölvugerðar ljósmyndir í Fræðasetrinu.
Í Fræðasetrinu fór einnig fram andlitsmálun, sem naut mikilla vinsælda og vöfflusalan sló öll met.
