Dagur tónlistarskólanna var haldinn hátíðlegur í Tónlistarskóla Seltjarnarness laugardaginn 15. febrúar. Fjöldi manns sótti opið hús, þar sem nemendur og kennarar buðu upp á sýnishorn af öllum stílbrigðum tónlistar sem kennd er við skólann.
![Kári Húnfjörð Einarsson og Sigurður Engilbertsson Kári Húnfjörð Einarsson og Sigurður Engilbertsson](/static/files/frettir/medium/img_6559.jpg)
Einstaklingar, samspilshópar, big-band og lúðrasveitir komu fram á fjölbreyttri dagskrá. Í kennslustofum voru hljóðfærakynningar, þar sem kennarar kynntu sín hljóðfæri og var gestum boðið að prófa hljóðfærin undir leiðsögn.
Við þetta tækifæri afhenti Lionsklúbbur Seltjarnarness Skólalúðrasveit Seltjarnarness nýjan barítón-saxófón sem þeir tóku þátt í að fjármagna. Haukur Gröndal, kennari við skólann, fékk það hlutverk að vígja gripinn með stórsveit skólans. Sveitin var sérstaklega sett saman af þessu tilefni og skipuð kennurum og fyrrverandi nemendum skólans.
![Kári Húnfjörð Einarsson, Haukur Gröndal og Sigurður Engilbertsson Kári Húnfjörð Einarsson, Haukur Gröndal og Sigurður Engilbertsson](/static/files/frettir/medium/img_6560.jpg)
Dagur tónlistarskólanna er haldinn í febrúarmánuði ár hvert. Við þetta tækifæri efna tónlistarskólarnir til hátíðar hver á sínum stað, sem er ávallt skemmtilegt innlegg í menningarlíf hvers byggðarlags. Í Tónlistarskóla Seltjarnarness eru nú um 220 nemendur og þar starfa rúmlega 20 kennarar. Auk þess eru starfandi tvær lúðrasveitir við skólann, fjöldi samspilshópa og hljómsveita.
Á myndunum má sjá Kára Húnfjörð Einarsson, stjórnanda skólalúðrasveitarinnar og Hauk Gröndal kennara með nýja hljóðfærið ásamt Sigurði Engilbertssyni formanni Lionsklúbbs Seltjarnarness.