Bæjarstjórn Seltjarnarness hefur að frumkvæði meirihlutans samþykkt umtalsverða breytingu á gjaldskrá leikskóla Seltjarnarness. Í breytingunum felst 10% lækkun á grunngjaldi, 50% hækkun systkinaafslátta auk um 30-60% hækkunar á framlögum til einkarekinna leikskóla. Breytingarnar taka gildi frá og með 1. apríl næst komandi.
Gjald fyrir átta tíma vistun með fullu fæði verður eftir breytingu kr. 26.244 án afslátta. Systkinaafsláttur á leikskóla fer úr 25% í 50% fyrir annað barn og úr 50% í 100% fyrir þriðja barn. Á Seltjarnarnesi er systkinaafsláttur einnig veittur á milli skólastiga, það er leikskóla, grunnskóla og dagforeldra og fer hann í því tilfelli úr 25% í 50% fyrir systkini. Afslátturinn gildir einnig vegna systkina hjá dagforeldrum þannig að niðurgreiðslur til þeirra hækka í samræmi við breytingarnar. Framlög til einkarekinna leikskóla hækka á bilinu 30-40% eftir hjúskaparstöðu og verða eftir breytingu kr. 53.100 með barni hjóna eða sambýlisfólks og kr. 62.400 með barni einstæðra foreldra.
Seltjarnarnes er fjölskylduvænt sveitarfélag sem leggur áherslu á góða þjónustu við íbúa eins og sjá má meðal annars í nýlega samþykktum fjölskyldu- og skólastefnum bæjarins. Útgjöld fjölskyldna þar sem mörg börn eru á skólaaldri geta verið umtalsverð ef viðkomandi nýta þjónustuna að verulegu leyti. Þessi breyting mun bæta afkomu barnafjölskyldna á Seltjarnarnesi og ekki síst koma barnmörgum fjölskyldum til góða. Hún mun einnig stuðla að því að börn af Seltjarnarnesi eigi greiða leið í einkarekna leikskóla sem eykur valfrelsi Seltirninga og bætir þjónustu við íbúa.
Sjá Gjaldskrá leikskóla Seltjarnarness (1. apríl 2007) og
Niðurgreiðslur til einkarekinna leikskóla (1 apríl 2007)