Tveir vaskir hjólabrettamenn, þeir Birkir Kristján Guðmundsson og Daníel Kristjánsson, gengu á fund bæjarstjórans á Seltjarnarnesi á dögunum og afhentu honum undirskriftalista til stuðnings hugmynd þeirra um hjólabrettasvæði á Seltjarnarnesi. Á listanum voru tæplega 130 nöfn áhugamanna um hjólabretti og línuskautaiðkun en drengirnir segja aðstæður til iðkunar íþróttarinnar takmarkaðar á Nesinu.
Rampur sem settur var upp fyrir nokkru mun fyrst og fremst henta fyrir línuskauta en síður hjólabretti sökum þess að hann sé of brattur og auk þess vanti á hann handrið sem hægt sé að stökkva upp á. Eins og er stundar hjólabrettafólk íþrótt sína víðs vegar um bæinn við mismunandi góðar aðstæður að sögn. Bæjarstjóri tók vel í umleitan drengjanna og mun koma málinu í farveg.