Fjölmörg heimili á Seltjarnarnesi hafa verið heimsótt af starfsmönnum Orkuveitu Reykjavíkur undanfarið sem hafa unnið að því að kortleggja aðstæður til að unnt sé að leggja lokahönd á hönnun verksins. Orkuveita Reykjavíkur hafnaði öllum tilboðum í 1. áfanga í lagningu ljósleiðarans á Seltjarnarnesi. Tilboðin voru öll langt yfir kostnaðaráætlun sem rakið er til mikillar þenslu á jarðvinnumarkaði.
Verkefnin sem boðin voru út fólust í að grafa niður jarðvegsrör fyrir ljósleiðaranet, leggja ljósleiðarastrengi og tengja byggingar við netið. 
Á Seltjarnarnesi var gert ráð fyrir að 600 hús yrðu tengd í þessum áfanga. Samkvæmt upplýsingum frá OR hljóðaði kostnaðaráætlun við þennan áfanga á Seltjarnarnesi upp á 65 milljónir. Lægsta tilboðið hljóðaði upp á rúmlega 174 milljónir, sem er um 170% hærra en kostnaðaráætlun. Fimm fyrirtæki buðu í verkið.
OR hefur náð samningum við verktaka um verkið og verður hafist handa á allra næstu dögum. Framkvæmdaáætlun hefur eitthvað raskast en þó er reiknað með að upphafleg áætlun standist að mestu leyti.