Seltjarnarnesbær, Mosfellsbær og Reykjavík hafa í samstarfi við bókasöfn viðkomandi sveitarfélaga styrkt bókagjöf til allra barna sem koma í þriggja og hálfs árs skoðun á heilsugæslustöðvarnar.
Börnunum á Seltjarnarnesi er boðið í heimsókn í bókasafn bæjarins en þar fá þau að gjöf bókina „Stafrófskver“ eftir Sigrúnu og Þórarin Eldjárn. Hún hefur verið ófáanleg um langt skeið en var sérstaklega endurútgefin af þessu tilefni.
Stafrófskverið vekur áhuga barna á stöfunum með rími og leik og hver stafur í stafrófinu fær sitt kvæði. Þannig fær stafurinn á, svo dæmi sé tekið, þessa vísu:
Ávaxta-Árni
lagði árar í bát.
Í ástum og ánni
fer Árni með gát.