Ársskýrsla Seltjarnarness fyrir árið 2006 er komin út og hefur henni verið dreift á hvert heimili líkt og undanfarin ár.
Árið 2006 var mikið framkvæmdaár, má þar helst nefna endurgerð sundlaugar, bygging glæsilegs keppnisvallar, gagngerar endurbætur á skólamannvirkjum og bygging glæsiíbúða á Hrólfsskálamel hófst. Þá var rafræna þjónustugáttin Rafrænt Seltjarnarnes opnuð á vef bæjarins sem er meðal annars ætlað að auðvelda aðgengi bæjarbúa að þjónustu bæjarins.
Skólastefna og fjölskyldustefna, sem unnar voru í samráði við bæjarbúa, litu dagsins ljós á árinu. Markmið stefnanna er að skapa kjöraðstæður fyrir nám og kennslu ungmenna ásamt því að bjóða upp á fjölskylduvænt samfélag sem þjónar og tekur mið af þörfum íbúanna. Menningarlíf hefur blómstrað og má þar helst nefna sýninguna Eiland sem haldin var út í Gróttu. Aðsókn var mikil og vakti sýningin einnig athygli á Gróttu sem einni af mestu náttúruperlum höfuðborgarsvæðisins.
Framgangur telst góður á Seltjarnarnesi, bæjarsjóður öflugur og fjármálastjórnin styrk. Ársskýrsla Seltjarnarness 2006 gefur því til kynna traustan hag og bjarta framtíð Seltirninga.
Ársskýrsla Seltjarnarnesbæjar árið 2006 
1,66 mb.
Ársskýrsla Seltjarnarnesbæjar árið 2006 
148 kb.