Íbúar Seltjarnarness eru ásamt íbúum Reykjanesbæjar eru ánægðastir Íslendinga með sveitarfélögin sín samkvæmt könnun er Capacent Gallup gerði í sumar. Reykjavík, Fjarðabyggð og Árborg verma hins vegar botnsætin. Könnunin ber saman ánægju með þjónustu meðal íbúa í 15 stærstu sveitarfélögum landsins.
Í könnuninni var spurt um álit fólks á helstu þjónustuþáttum sveitarfélaga, svo sem þjónustu grunn-, leik- og tónlistarskóla, félagsþjónustu og skipulagsmál. Þegar litið er á heildarniðustöður skipta Seltjarnanes og Reykjanesbær með sér fyrsta sæti.
Jónmundur Guðmarsson, bæjarstjóri, telur ástæðurnar að baki ánægju íbúa meðal annars vera pólitískan stöðugleika og styrka umgjörð bæjarfélagsins. „ Að mínu mati er það einnig lykilatriði að líta á rekstur bæjarins sem samkeppnisrekstur í þjónustu, þar sem keppninautarnir eru önnur sveitarfélög. Það höfum gert um nokkurt skeið með ágætum árangri. Að auki má benda á að við höfum lækkað útsvar í tvígang og fasteignagjöld í þrígang undanfarin ár en miðað við könnunina mælist það vel fyrir hjá íbúum.“